Cloud Front
Qamar Zaman Qaira

پاناما کیس میں حکومت گھبراہٹ کا شکار ہے ، قمرزمان کائرہ

پیپلز پارٹی کو جمہوریت کے سرٹیفکیٹ کی ضرورت نہیں ،ہم جانتے ہیں کس نے جمہوریت اور کس نے آمریت کا ساتھ دیا،پی پی رہنما

اسلام آباد: پیپلز پارٹی کے رہنما قمر زمان کائرہ نے کہا ہے کہ حکمران جماعت مسلم لیگ (ن) کی جانب سے جلسوں میں طاقت کا مظاہرہ اور اپوزیشن پر تنقید کرنا اس بات کو ظاہر کرتا ہے کہ پاناما لیکس کے مقدمے میں حکومت گھبراہٹ کا شکار ہے۔ نجی ٹی وی سے گفتگو کرتے ہوئے قمر زمان کائرہ نے کہا کہ ن لیگ کے وزراء سیاستدانوں کے ساتھ عدالت کو بھی دھمکیاں دے رہے ہیں تاکہ کیس کا فیصلہ ان کے حق میں آجائے،انہوں نے کہا کہ اگر ہم ماضی کی بات کریں تو آج تک عدالتوں سے ن لیگ کو صرف انصاف ہی ملا ہے جبکہ ان کے خلاف کوئی فیصلہ نہیں آیا،ان کا کہنا تھا کہ ن لیگ کی جانب سے ماضی میں سپریم کورٹ پر حملے بھی کیے گئے،

لہذا اس بار دیکھنا ہوگا کہ فیصلہ کس کے حق میں آئے گا۔قمر زمان کائرہ کا کہنا تھا کہ پیپلز پارٹی کو کسی قسم کے جمہوری سرٹیفکیٹ کی ضرورت نہیں کیونکہ ہم جانتے ہیں کس نے جمہوریت اور کس نے آمریت کا ساتھ دیا۔پی پی رہنما نے کہا کہ سب سے زیادہ اکثریت مسلم لیگ ن کے لوگوں کی ہے، جنہوں نے آمریت کے ساتھ وقت گزارا۔ان کا کہنا تھا کہ اگر پیپلز پارٹی کی حکومت کو دیکھنا ہے تو 2008 کے بعد کے 5 سال ہی کافی ہیں جن میں حالات میں بہتری آئی،انھوں نے کہا کہ وہ سمجھتے ہیں کہ جو کچھ اس وقت ہو رہا ہے وہ ن لیگ کے خلاف کوئی سازش نہیں بلکہ ایک حقیقت ہے جو پاناما پیپرز کے ذریعے سامنے آئی ہے۔